Eguesko San Martin eliza - Ayuntamiento Valle de Egüés

XIII. mendeko eliza, aitzin-gotikoa. XVII. mendean berritua. Lau tarte desberdineko oinplano laukizuzena, eta burualde zuzena.

Biztanle kopurua gora eginagatik ere, Egues betiko herri lasaia da. “El Irati” trenbideak geltoki bat izan zuen herri honetan.

Eguesko San Martin eliza estilo gotikoaren lehen urteetakoa da; beraz, XIII. mendearen hasieran eraiki omen zuten. Kanpoaldeko silarriak txukun daude paratuta, eta horrek halako irudi trinkoa eman dio eraikuntzari. Ebanjelioaren nahiz burualdearen aldeko horma-bularrek irudi hori nabarmendu dute.

Eliza barnean, erretaula azpimarratu beharra dago. Erretaula nagusia San Martini eskainia dago. Juan de Gazteluzar mihiztatzaileak egin zuen. 1.554 dukatetan tasatu zen, eta ziur aski, egileak dirutza hura kolkoratuko zuen. Erretaula XVI. mendearen bukaerakoa da. Gaur egunera iritsi diren zilargintza-piezen artean, zilarrezko bi kaliz nabarmendu behar dira, bata XVI. mendekoa, eta bestea, barrokoa, XVIII. mendekoa, Iruñeko tailer batetik heldu dena.

GAUZARIK INTERESGARRIENAK

Dorrea
Korua
Bataiarria
Erretaula neoerrenazentista, alde banatan 1624ko erretaula bat duela, Juan Antxietaren alargunak halaxe nahirik: Sortzez Garbiaren erretaula eta Doloretako Ama Birjinaren erretaula
Erretaula nagusia San Martini eskainia, erromanista, XVI. mendekoa. Arte maila handia
Santa Barbararen erretaula, XVI. m., neoerrenazentista
Gurutziltzatua, XVII. mende hasierakoa, erromanista.
Sagrarioak, XVI. eta XVIII. m.
Katalogo orokorrean gauza hauek jasoak daude: bi kaliz (bat, zilarrezkoa, errenazentista, XVI. mendekoa; bestea, zilarrezkoa, barrokoa, XVIII. mendekoa), 1797ko bi krisma-ontzi, zilarrezkoak, zilarrezko parrokia-gurutze bat XVIII. mendekoa, eta zilarrezko ekisaindu bat, 1818koa.
Elizbarrutiko Museoan Eguesko bakegile bat gordea dago.