Hasierako ideia Muxutrock nafar taldearen kontzertu bat izan zen errefuxiatuen zelai batean, baina hura ez zen egiterik izan. Azkenean, ordea, Iruñeko ekintzaile talde horrek dokumental bat ekarri digu, Europan Atenas eta Lesbos uhartearen artean babes bila dabiltzanen atakara hurbiltzeko. Musikaz, emozioz, oinazez eta itxaropenez beteriko bidaia da, eta bozgorailu izan nahi du egun batetik bestera beren lurra uztera behartuta egonen zirela inoiz imajinatu ez zuten gizon, emakume eta haur horiendako.