|
Zentzu zabalean, Iruñetik
sei kilometrora aurkitzen da Olatz, baina zentzu ertsian kasik
ukitzen du Nafarroako hiriburua, Mendillorri Iruñeko beste
auzo bat denez geroztik. Kontzeju honek 652 biztanle ditu eta
Gorraitz kenduta Eguesibarko herririk handiena da biztanleriari
dagokionez. Hiriguneak herriko etxe zaharren edertasuna gorde
izan du, eraikuntza berriekin nahasten direlarik. Ekialdeko Ingurabideak
Oltzerako sarbideak hobetu egin ditu, errepidea ez baita herritik
igarotzen. Hartara, biztanleen bizi-kalitatea goratu da, lehen,
herriak jasan behar zuen trafikoa desbideratu
baitute.
Olatzko udalbarrutian Eguesibarko
udal kiroldegia eraiki dute. Bailarako bizilagunen zerbitzura
dagoen eraikuntza honek instalazio modernoenak dauzka (igeritoki
estalia, erlaxatzeko aretoa, gimnasioa, gorputz-zainketarako zonaldea,
pilotaleku estalia, sorosmen eta botika zerbitzuak, monitoreak,
ikastaroak eta abar luze bat). 1998an zabaldu zenetik, kiroldegia
bailarako bizilagunen elkargunea bilakatu da. Aisia eta kirolaren
inguruko beharrak bermatzeaz gain, bizilagunen arteko harreman
sozialak sustatzen ditu, elkarbizitzarako oso egokia bihurtuz.
Historiari dagokionean, Olatz aintzinako
erret-jauregi bateko herria izan zen seguruenera. Izan ere, garaiko
idazkiek diotenez, 1367. urtean, Carlos Bigarrenak bere irin-errota
Juan Ruiz de Aibarri saldu zion. Halaber, Olatzek koroari ordaindu
beharreko zergen eskubideak jaun honi betiko eman zizkion erregeak.
XIV. mendean, Nafarroako errege-erreginena izan zen jauregi bat
egon zen halaber, zeina irin-errotarekin batera 1.000 frankoren
truke saldu zion erosle berari. XV. mendearen erdialdera, Nafarroak
ezagutu zituen gatazka eta gerra zibilen ondorioz aipatutako gaztelua
eskuz aldatu zen. Joan de Labrit erregeak bere diruzaina zen Johan
den Bosquet-i eman zion, Gracian de Beaumoti, bere benetako jabe
eta jaunari eman beharrean, azken honek desdeialtasunez jokatu
baitzuen anai arteko borrokaldi horietan.
(Iturria: Ibirikuko Kontzejuaren lehendakaria, Nafarroako Entziklopedia
eta Eguesibarko Udal Plangintza)
|
