|
Bizitoki lasaia egiteko asmoz altsatutako
urbanizazioa da Gorraitzekoa. Erroldatutako biztanleriari erreparatuta,
azken urteotan gehien hazi den herrigunea dela esan dezakegu.
Gainera, aurreikusita dago populazioa gehiago handituko dela,
hirigintzaren alorrean urbanizazioa hedatuz doalako oraindik (4.500
biztanle izatera iritsiko dela espero
da).
Gorraitzen bizitzea oso erosoa da,
Iruñetik oso gertu baitago, soilik 2,6 kilometrora. Gainera,
duela gutxi Ekialdeko Ingurabiderako sarrerak hobetu dira, horretarako
hainbat bide eta biribilune paratuz. Hortaz, komunikazioa erabatekoa
da, orduerdioro Iruñera doan autobus zerbitzua baitauka
Olatzekin batera.
Urbanizazioak oso ezaugarri bereziak
ditu, eta horien artean nabariena Gorraitzeko Golf Kluba da, herrigunearen
erdi erdian dagoena. Hemezortzi zulo ditu urbanizazioa edertzen
duen zelaiunean barreiatuta. Halaber, XVI. mendeko jauregi bat
aurki dezakegu Gorraitzen, lehen aurri egoeran zegoena eta berriki
zaharberritu dutena bertan jatetxe bat paratzeko. Berrogei metro
eskasetara San
Estebango eliz-parrokia aurkitzen da, duela oso gutxi arte
ere aurri egoeran izan dena eta martxoaren 25az geroztik kapera
berria agertzen duena. Lehen, kanpoko hormak eta sarrera-atea
besterik ez zeuden zutik. Urbanizazioa sortu ondotik, Gorraitzek
eliz-parrokia bat behar zuela konturatu eta lanean jarri ziren.
Tenpluak ekitaldi-areto bat izanen du etorkizunean, hala nola
eliz-etxe bat.
(Iturria: Ibirikuko Kontzejuaren
lehendakaria, Nafarroako Entziklopedia eta Egusibarko Udal Plangintza) |
