|
Ardanatz Eguesibarreko hegoaldean
kokatua dago. Iruñetik 8 kilometrora aurkitzen da eta 5,68
km karratuko hedadura dauka. Ekialdeko Ingurabidetik atera eta
Sarrigurendik igarotzen den errepidetik ailegatzen ahal da bertara.
Ardanatz oso malkartsua ez den aldapa baten goikaldean ezarria
dago. Altuera honek Iruñerriaren zati handi bat ikusteko
aukera eskaintzen dio. Agian honakoa dugu herriko ezaugarririk
bikainena, hala nola arras ongi mantenduriko inguruaren
edertasuna (ez da arraroa herria pasioan gurutzatzen duen jendea
ikustea). Erroldaren arabera, egun 54 auzolagun ditu.
Inguruko herriekin gertatu bezala,
behinala erret-jaurerria izan zen. Bestalde, bailararen bihotzetik
urruti samar dagoenez, sarritan auzian jarri da ea ze bailarari
dagokion, Eguesibarrari edo Arangurenekoari. Eztabaida hauexek
XIII. mendetik datozkigu. Orduan, Ardanatzek Koroari zergak ordaintzen
bazizkion ere, bailarako beste herriekin alderatuta, azpimarragarria
da zergarik ordaindu beharra ez zuten aitoren-seme kopurua. 1467.
urteko agirietan ageri denez, Leonor printzesak Oger Urpideri
herriak koroari ordaindu beharreko petxa eman zion. Bailarako
ohiturari jarraiki, 1835-45 hamarkada arte bailarako diputatuak
eta herriak aukeraturiko erregidoreak gobernatu zuten Ardanatz.
Ardanatzeko
eliz-parrokia herriko eraikinarik bikainena da. XIII. mendean
sortu zen San Vicenteren izenpeko. Barruan Domingo de Bidarte
mihiztatzaileak eta beronen suhiak, Domingo de Lussa eskultoreak,
egindako erretaulak ikusten ahal dira (erretaula nagusia eta albo
batera dagoena). Elizak eraldaketa aunitz ezagutu du historian
zehar, erdiko nabearen estalkian antzematen den bezalaxe.
San Vicenteren omenez ospatzen diren
herriko jaiei irailaren 8an ematen zaie hasiera, eta egokitutako
egunaren arabera iraileko lehenengo astean edota bigarrenean ospatzen
dira.
(Iturria: Ardanatz-eko Kontzejuko
Lehendakaria, Nafarroako Entziklopedia eta Eguesibarreko Udal
Plangintza). |
