MAPA FISIKOAK

Eguraldia:
Mediterranear giroko eragina jasotzen duen eguraldi ozeanikoa.

Tenperatura: Neguak epelak dira eta udak luze eta beroak, tenperatura oszilazio leunekin.
* Urteko batezbesteko tenperatura: 12,3 gradu.
* Hilabete sargoriena: abuztua, batezbeste 20,3 gradu.
* Hilabete hotzena: abendua, -3 eta 18 gradu bitartekoa.
* Batezbesteko tenperatura urtean bost hilabetez soilik jeisten da 10 gradutik behera.

Prezipitazioak: Aro lehorrik gabeko eguraldi hezea.
* Urteko batezbesteko prezipitazioak: 1000-1300 mm. inguru.
* Euria gehien jasotzen duten hilabeteak: abendua eta urtarrila, 1.200 mm. baino gehiago batezbeste.
* Sei hilabete hotzenetako batezbesteko prezipitazioak: Urte osoko prezipitazioen %57,4 eta %62,2 bitartean. Prezipitazioak, halaxe, erregulartasunez banatzen dira urteko hilabete guztietan.
* Lurrinketa potentziala: 600-700 mm. Honek esan nahi du ur horniketa bermatua dagoela.

Ezaugarri orokorrak:
* Neguak epelak dira eta udak luze eta beroak, tenperatura oszilazio leunekin.
* Prezipitazio ugari eta ongi banatuak urte osoan barrena.
* Hezetasun atmosferiko handia, maiz lainoak eragiten dituena.
* Haize indartsuak neguan.

Orografia
Orografikoki, Eguesibarran hiru zonalde ezberdindu daiteke.

Piriniotako Ibarrak:
* Batezbesteko altitudea: 900 m.
* Bizilekuak: Sagaseta, Elia, Egulbati eta Amokain.
Ibarrok Piriniotako paisaiari atxikitutako orografia dute, iparraldetik hegoaldera begira eta ekialdetik mendebaldera kokatuak dauden trokarte sakon eta basatietan. Bailararik garrantzitsuenak Egulbati eta Eliako Errekarena dira. Azken honetatik Lakarri, Egueseko mendirik altuenaren gailurra (1.046 m.), ikusten ahal da.

Ibarra:
* Batezbesteko altitudea: 510 m.
* Bizilekuak: Altzuza, Azpa, Egues, Elkano, Etxalaz, Erantsus, Ibiriku eta Uztarrotz.
Piriniotako ibarrak amaitu eta Malkaitz (711 m.), Mendizorrotz (786 m.), Tangorri (845 m.) eta Sariandi (800 m.) mendiek marrazten duten lerroraino dagoen zonaldea hartzen du. Ekialdetik Mendebaldera Urbi ibaiak, Iparraldeko trokarteetako ura biltzen duenak, gurutzatzen du. Ibarreko paisaia, aldapa guttikoa, Badostaingoaren antzekoa da.

Badostain eta Ardanatzeko lautadak:
* Batezbesteko altitudea: 500 m.
* Bizilekuak: Ardanatz, Badostain, Gorraitz, Olatz Ttipia eta Sarriguren.
Badostain eta Aldabarreneko gainek Arangurengo bailararekin egiten dute muga. Salbuespenak salbuespen, lurralde laua da. Labore zelaiez estalita dago nagusiki.

Landaretza
Ibarrako hiru zonalde orografikoen artean ez da ia ezberdintasunik.

Piriniotako Zonaldea: Egulbati herria trokarte estu eta ibai-arro ospelez osatutako gune honen barruan aurkituko dugu. Mendi-hegalen altuerak eta giroaren hezetasunak nahikoa eguraldi goxoa eragiten dute, atlantiar giroko haritz eta pagoetarako aproposa. Pagoen adaburuen azpiko itzalaren babesean hazten diren landareekin topo egin dezakegu: huntza, elorri zuria eta orkideoren bat edo beste. Zelaiak nagusituz doazen arabera baina, pagoak desagertu eta ibarbasoko espezieak ageri dira, hala nola ezpela, ote zuria edota txilar zuria, ibarreko toponimian aski ongi isladatzen den bezalaxe.

Gizakiak, alabaina, behinalako pagadia ebaki zuen, eta poliki poliki, pinu gorriak, mendi pinuak eta Larizio pinuak berezko zuhaitzak ordezkatu dituzte.

Bailara: Urbi ibai-arroan zehar sakabanatzen dira zuhaitz ale bakarrak, gainerako lur eremuak nekazal hustiaketarako erabiltzen baitituzte. Besteak beste, lizarrak, ibaiertzetan hazten diren makalak, eta noizbehinka haltza bat edo beste ikusten ahal da.

Badostaingo Lautada: Aire korronte bero eta eguzki ordu asko bereganatzen dituenez, lautadako zolua beste zonaldeetakoa baino idorragoa da. Hezetasun eskaseko lurretan hobe egokitzen diren zuhaitzak, arteak edo erkametzak esaterako, ugariak dira. Basoak, beraz, trinkoak dira eta ezpelek, patxaran sastrakek eta mazustek zaila egiten dute oso bertatik iragaitea.