INGURUGIROAREN GARAPEN-PLANGINTZA

2000. urteko otsailaren 8an Eguesibarreko Udalak Aalborg-eko agiriari atxikitzea erabaki zuen (Aalborg-Danimarka-1994ko maiatzak 27). Agiri honek hazkunde sostengarria erdiesteko beharrezkoak diren urratsak ezartzen ditu. Aalborgeko agiria Ingurugiroko Herri Ekimenen Nazioarteko Batzordeak bultzatu zuen. Hasiera batetan, 80 herritako agintarik eta munduko beste 253 ordezkarik (nazioarteko erakundeak, gobernu nazionalak, gune zientifikoak, aholkulariak eta bestelakoak) sinatu zuten. Agiria sinatzearekin batera, hiri eta herri txikiek epe luzera garapen sostengarria bultzatzeko programak martxan jartzeko konpromezua hartu zuten. Honekin batera, Europako hiri sostengarrien kanpaina abian jarri zuten.

Onartu zenaren legera, agiriak hiru atal ditu:

I-Adostasun adierazpena: Europako hiriak
sostengarritasunaren bidean.
II-Europako hiri sostengarrien kanpaina.
III-21 programaren herri ekimenetan parte hartu:
sostengarritasunaren aldeko herri plangintzak.

Hiru puntuen artean, II. eta III. dira erabilera praktikoagoa dutenak. Adierazpenak herri agintariek garapen sostengarriaren hedapenean izanen duten protagonismoa aipatzen du; izan ere "Ingurugiroa suntsitu nahi ez badugu bederen, munduko herri guztiek ezin dute herri industrializatuen baliabideen kontsumo maila euki, ez orain, ezta are gutxiago gerora begira". Hasierako puntu honek dio, halaber, sostengarritasunak baliabide material, hidriko eta energetikoen kontsumoak ezin duela naturak hauek berritzeko duen gaitasuna baino handiagoa izan. Bidenabar "kutsaduraren emisioak ezin du aireak, urak edota zoluak xurgatu eta prozesatzeko duten gaitasuna gainditu".
Bestalde, adierazpenaren II. puntuak "Europako hiri sostengarrien kanpaina" martxan jartzen du, herri erakundeek adierazpena berea egin eta abian jar dezaten, honako helburuekin:

-Europako hirien arteko laguntza erraztea, garapen
sostengarriaren aldeko lan-ildoak finkatu eta ezartzearren.
-Garapenerako bidean mesedegarriak diren herri ekimenen
inguruko informazioa bildu eta zabaltzea.
-Garapen sustengarriaren oinarriak beste herri agintariekin
batera sustatzea.
-Adierazpenaren aldeko sinatzaile berriak lortzea.
-Urtero "Hiri sostengarriaren saria" antolatzea.
-Europako batzordeari gomendio politikoak ematea.
-Hirietako ingurugiroko aditu taldeek argitaratzen dituzten
hiri sostengarrien gaineko txostenak laguntzea.
-Herri agintariei Europako Batasunaren legedi eta gomendio
zuzenak ezartzen laguntzea.
-Kanpainaren informazio buletina argitaratzea.

Horrela bada, hirugarren puntuak, aurrekoak ezartzen dituen helburuak aintzat hartuz, mandatariak plangintza zehaztua jarraitzera deitzen ditu. Logikoa denez, egin beharreko lehenengo gauza Eguesibarrak bizi duen egoeraren berri emanen duen Ingurugiro-auditoria osatzea da.
Aalborg-eko adierazpenak ematen dituen gomendioei jarraiki, 2000. urteko otsailaren 8an Eguesibarreko Udalak aipatu plangintza aurrera eramateagatik bereganatzen ahal dituen subentzio eta laguntzak eskatzea erabaki zuen. Irizpideek aktuazio egutegia ezartzea helburu dute, Ibarreko bizilagunek, plangintzaren sustatzaile eta onuradunek, ongi dakiten bezala.
Eskuarki, Aalborg-eko adierazpenarekin bat egin izanak, ibarreko ingurugiroa hobetu eta mantentzera lagunduko du. Ondarea guztiona da, baita ere ondorengo belaunaldiena, eta bizirik iraunen du baldin eta munduko garapenerako eredu bat ezartzeko gauza bagara. Eredu honek gure beharrak asetu eta naturaren birsorkuntza ahalmena uztartu beharko lituzke. Horrelaxe, Eguesibarrak berea egiten du ekologisten ardatz den esaldia: "Orokorrean pentsa ezazu eta tokian tokiko ekimenetan parte har ezazu".