EGUESIBARREKO HIRIGINTZA GARAPENERAKO PLANGINTZA

Elkano, Ibiriku, Egüés Sarriguren Olatz Badostáin           Bizilekuak Industria-guneak

Udal plangintzaren idazketaren beharra eta aukera.

Ibarraren antolaketa tresna izanen den Udal Plangintzaren idazketak bi aukera eskaintzen dizkio gure udaletxeari. Dena dela, lehenik eta behin, kontuan hartu behar da bailarak bizilekuetarako eta hirugarren sektorearendako eskaintzen dituen ezaugarri estrategikoak Iruñerriaren barruan kokatua egoteari zor dizkiola. Iruñerriko Iparekialde eta Mendebaldeko zonaldeak industriari zuzenduta daude, Iparraldeko ingurabidearekin muga egiten duten udalen eskaintzak gainezka egin du, eta Unibertsitate Publikoak Hegoaldeko lurren garapenerako sortzen dituen arazoak handiak dira.
Hortaz, bi dira udal plangintzak eskaintzen dituen aukerak. Batetik, lurraldea ikuspuntu orokor batetik antolatu beharra aurreikusten da, eta honek, administrazio eta kudeaketaren aldetik, koherentzia eskatzen du. Antolakuntza orokorra nekez inprobisatu daiteke, eta huraxe bere baitan hartuko duen tresna baten idazketa lagungarria izan daiteke, kontraesan eta lokalismoak agerian utziko baititu.
Bestalde, ibarreko etorkizunean konplexurik gabeko berezko ahotsa izatea beharrezkotzat jotzen dugu, intereseko gaiak gu geu defendatzearren. Lurralde honek gerora begira dituen itxaropenak, izatez, Iruñerriko era guztietako azpiegiturak gauzatzearen araberakoak badira ere, egia da baita ere Iruñerriko udal guztiek prozesu bera bizi izan dutela, eta gartsuki defendatzen dituzten garapen eta eskuduntzak Iruñerriaren barruan kokatuta egoteari zor dizkiotela, hala nola Iruñeko hazkunde eta garapenari. Honek berebiziko garrantzia izan du Iruñeak mugakide dituen udalerrien garapenean.

(Udal plangintzatik hartua)

Hirigintza iharduerak aurreikusita dituzten gunerik azpimarragarrienak

Hirigintzari dagokionean Eguesibarreko hazkunderik aipagarrienak, batetik, Elkano-Ibiriku-Egues zonaldean eta, bestetik, Badostain inguruan aurreikusten dira. Bidenabar, bailararen barruan egonik, Nafarroako Gobernuaren Udal-Gaindiko Plangintza Sektorialaren esku badago ere, Sarrigurenen 4.211 etxebizitza bilduko dituen Ekohiriaren eraikuntza aurreikusten da. Industriarako orubeei dagokienean, bestalde, hazkunderik bikainenak Olatz eta Egueseko industria-guneetan emanen dira. Modu argiagoan azaltzearren, hirigintzari lotutako aldaketak, hala etxabizitzak eraikitzeko nola industriarako, banan banan aztertuko ditugu segidan.

I. Etxebizitzak helburu dituen zolua:

* SARRIGURENGO EKOHIRIA: Sarrigurengo Ekohiria Nafarroako Gobernuaren ekimena da, eta Nasursa izeneko elkarte publikoak kudeatzen du. Iruñeko ekialdean eraikiko da, eta 1.501.906 metro karratu beteko ditu. Hektarea bakoitzeko, batezbeste, 29 etxabizitza bilduko ditu. Hiru helburu nagusi ditu:
1-Nafarroako Gobernuak etxe gabeziaren aurrean hartzen duen konpromezua:
Konstituzioak herritarrei etxabizitza eukitzeko bermatzen dien eskubidea gauzatzea dugu Nafarroako Gobernuko Ingurugiro, Lurralde Antolaketa eta Etxabizitza Sailaren helburu nagusietariko bat.
Lan-ildo honen barruan aurkitzen da hain zuzen ere Sarrigurengo Ekohiria. Nafarroako Gobernuak etxabizitza eskaintza eskuragarri eta kalitatezkoa osatu nahi du, gizarte kolektibo handiek etxe bat eukitzeko dituzten aukera errealak hobetzearren. Ekimenak Iruñerriko hirigintzaren garapena ahalbidetuko du. Babes neurri ezberdinen bitartez salneurria kontrolatua egonen da, eta hiritarrek etxea eskuragarriagoa izanen dute.

BOE, Babes Ofizialeko Etxebizitzak: 2.452 etxebizitza (%58,22).
TSE, Tasaturiko Salneurriko Etxebizitzak: 1.434 etxebizitza (%34,05).
MSLE, Mugatutako Salneurri Libreko Etxebizitzak: 325 etxebizitza (%7,73).

Ekohiriaren garapena zolu publikoko lehiaketen bidez aterako da aurrera, Mendillorrin egin zenaren antzera. 2001 urtean zehar lehenengo etxebizitzak banatzeko lehiaketak gertatuko dira.

2-Berrikuntza arkitektonikoak eta hirigintza bioklimatikoa
Nafarroako Gobernuak, azken bolada honetan, irizpide bioklimatikoak aintzat hartu izan ditu zolu publikoa nori eman erabakitzeko tenorean. Sarrigurengo Ekohiriarekin Foru Administrazioak arkitekturaren printzipioak eta hirigintza bioklimatikoarenak oinarri izanen dituen esperientzia pilotua sustatu nahi du:

-Energia aurreztu,
-energia berriztagarriak bateratu, eta
-"eraikuntza osasungarria"-ren printzipioak ezarri.

Eraikuntza bioklimatikoa inguruarekiko errespetu eta konpromezu berezian oinarritzen da, eta honek energiaren erabilera sostengarria suposatzen du. Finean, eraikuntza bioklimatikoa etxeak irizpide ekologikoen arabera eraikitzean datza.

3-Sarrigurengo Ekohiria operazio pilotu gisa

Sarrigurengo Ekohiriak, gure ekosistemaren aberastasuna sendotzeaz gain, Nafarroak teknologia berrien alorrean, ingurugiroa eta bizitza kalitatea ardatz duten teknologietan, erdietsi duen maila indartzera lagunduko du.

Nasursak, Nafarroako Gobernuaren elkarte publikoak, proiektua kudeatuko du. Egoki deritzonean fase bakoitzeko eraikitze lanak aukeratzeko lehiaketak deituko ditu, eta babestutako etxebizitzen eskaintzetan bete beharreko baldintzak argitara emanen ditu. 2001tik 2006ra aurreikusitako 4.211 etxabizitzak eraikiko dira.

*ELKANO-IBIRIKU-EGUES GUNEA

Hiru kontzeju hauen zoluek egitura berezia erakusten dute. Herriaren arabera, zoluak erabilera ezberdina (etxebizitzak edota industrigunea) izango du. Hiru garapen gune zehaztu dira, eta honako kapituloari bi hauek dagozkio:

I. AR-1 (etxebizitza gunea): Orubearen gutxi gora-beherako hedadura 267.505 m2koa da. Guztira 321 etxe eraikitzea espero da, eta dentsitatea 12 bizilagun hektarea bakoitzeko izanen da.

II. AR-3 (gune mistoa, etxabizitzak eta industriak): Zonalde honetan etxebizitzen eraikuntza, oraintxe, bi enpresa biltzen dituen industrialdearen zabalkuntzarekin uztartuko da. Azalera 223.388 m2koa da. Horietarik, 40.000 industrigunerako bideratuko dira, eta beste guztiak 165 etxebizitza eraikitzeko. Dena dela, uneotan etxebizitzendako aurreikusitako lur-zatia handitzeko aukera aztertzen dihardute, zabalkuntza industrialaren kaltetan.

*BADOSTAINGO KONTZEJUA

Badostainen 171.983 metro karratuko azalera duen zolua urbanizatu daiteke. Aurretik erabaki denaren arabera, 171 etxebizitza eraikiko dira osotara. Maizetan etxabizitza gune berriak trinkoak eta espezifikoak dira, baina hau ez da Badostaingo kasua. Eraikuntza berriek egungo herrigunearekin bat eginen dute.

*BESTE KONTZEJUAK

Egueseko Kontzeju gehienetan herriguneak zabalduko dituzte, baina hemen aipatu ditugun plangintzetan ez bezala, herrietako berezko hazkundearen ondorioz gertatuko da. Hortaz, aldaketak neurri ttikiagokoak izanen dira. Eguesibarreko Udaletxean publikoak eskura duen plangintzak herri guzti hauek biltzen ditu baita ere

II. Industria eta Merkataritzari bideratutako zolua:

*OLATZ TTIPIKO INDUSTRIALDEA:

Olatz Ttipian etxebizitzak eraikitzeko zolurik ez badago ere, gune industriala zabaltzeko aukera zabalik dago. Zehatzago esateko, bailararen hazkunde demografiko eta ekonomikoa direla kausa, bertan ezarri nahiko luketen enpresek 145.313 m2ko zolua dute eskura.

*EGUESEKO INDUSTRIALDEA:

Egueseko industrialdearen zabalkuntzak AR-2 izen teknikoa jasotzen du (industri-gunea). Industrialde honek inguruarekiko errespetua bereziki zainduko du. Industri nabeak berdeak izanen dira, eta 252.889 m2ko hedadura duen lursail batetan altxatuko dira. Jada eraikita dauden lantokien eta NA-150 Iruñea-Agoitz errepidearen artean libre gelditzen den orubean ezarriko dira enpresa berriak.

*SARRIGURENGO MERKATARITZA GUNEAK:

Sarrigurengo Ekohiriak merkataritza eta industriarako guneak eskainiko ditu baita ere. Etxabeek proiektuari 30.000 m2 erantsiko dizkiote. Hauei, "berrikuntza kuboak" izeneko guneetan eraiki daitezkeen 6.000 metroak gehituko zaizkie.
Nahiz eta aurreko bi guneak merkataritzari bideratuak dauden, Sarrigurengo "Aukera Guneak" izakera industrialagoa dauka. Ekialdeko ingurabidetik haratago hedatzen da, 125.587 metro karratu hartzen dituelarik. Iruñeko gertutasuna, hiriburutik hurbiltzeko erraztasuna, eta inguruko populazio-guneen tamaina direla eta, enpresa aunitzek hemen ezartzea erabakiko dutelakoan gaude.

(Edozein informaziorako edota hementxe ageri diren datuak osatzeko, argibideak Ibarreko udaletxean eskatu daitezke, tfnoa. 948-33 16 11)