Runa Arku-Tiro Kluba

1993. urtean Runa Arku-Tiro Kluba sortu zen. Arkulariak esperientziadun kirolariak ziren zegoeneko, aurretik beste tiro klubetan arituak baitziren. Ordutik, kluba dexente handitu da. 10 bazkidek sortu zuten eta orain 56 lagun dira arku eta gezien artean punteria zorrozten dabiltzanak. Klubaren instalazioak Azpako Kontzejuan (Eguesibar) daude lekututa. Instalazioek tiro-olinpikorako zelaia eta erabilera-anitzeko areto bat hartzen dituzte.

Kategoria ezberdinetan Nafarroako txapelketa zenbait eskuratu izana da meriturik azpimarragarriena palmaresari buruz mintzatzen hasita, munduko zein estatuko txapelketetan lortutako sailkapen bikainak ahaztu gabe:

Espainiako Txapelketa irabazi zuen Mª Carmen Rubio selekzio paralinpikoan parte hartzeko deitu zuten munduko azken Arku-Tiro txapelketan, Espainiako ordezkari gisa.

Iñaki Auza. Valdepeñas 2000 Espainiako txapelketako banakako round-ean zazpigarrena sailkatu zen. Nafarroako taldeak bostgarren lekuan bukatu zuen txapelketa.

1999ko Atari Zabaleko Espainiako Txapelketan, Javier Senosiainek urrezko domina irabazi zuen 90 metroko distantzian.

Nafarroako hainbat txapelketa absolutu irabazi dute klubeko kirolariek.

Arku-tiroaren historia

Historialariek diotenez, duela 25.000 urte inguru hasi ziren arkua, ehiza edota gerrarako, erabiltzen. Jasota geratu da egiptoarrek orain direla 5.000 urte erabiltzen zutela arkua. Beste faktore batzuren artean, arma honi zor diote egiptoarrek orduko nagusitasun militarra. Arkua, edonolakoa izanda ere, aintzinaroko kultura ia guztietara zabaldu zen.

Mendebaldeko sistema militarretan zuen garrantzi eta pisuak, 1588. urtean Espainia eta Ingalaterra aurrez aurre jarri zituen Armada Garaitezinaren borrokaldira arte iraun zuen. Guda honek bolboraren nagusitasunaren hasiera suposatu zuen, hala nola arku eta gezien gainbehera, tiratzaile ingelesek su-armak erabiliz erraz asko suntsitu baitzuten Espainiako armada, zeinak jaurtiketa ahalmena betiko arkularien esku ipini baitzuen. Oraindik orain, Afrika Erdialdean eta Hegoamerikan badira zenbait leinu arkua erabiltzen jarraitzen dutenak, bai arrantza eta ehizan bai eta euren arteko liskarrak konpontzeko ere.

Arku-tiroa kirol amateur gisara aspalditik ezagutzen da, batik bat Ingalaterran. Arku-tiro txapelketarik aintzinakoena "Acient Scorton Arrow" izenarekin ezagutzen da. Bere jatorria 1763. urtean kokatzen da Yorkshiren eta etenik gabe burutu (eta burutzen) da gaur egun arte.

1900. urtean Joku Olinpikoetan sartu zuten lehen aldiz, 1904 eta 1908 urteetako olinpiadetan esperientzia errepikatu zelarik. 1920. urtean, azken aldiz ikusteko aukera izan zen, 52 urte beranduago kirol olinpikoa bezala berriz onartu zuten arte Municheko jokoetan (1972). Orduan, gizonezkoak eta emakumezkoak lehiatu ziren. Hogei urte beranduago, zenbait berrikuntza gehitu zizkioten arku-tiro txapelketen gaineko interesa zaletuen artean handitzearen kariaz. Banakako aprobetan 64 arkulari bildu eta batera lehiatzen dira finalerako sailkatzeko helburua hartuta. Nazioarteko Arku Federazioko arauen arabera, puntuazio hoberena lortzen dutenak finalera pasatu eta domina olinpikoa lortzeko lehian arituko dira.